கிளிநொச்சி கல்வி வலய முறையற்ற இடமாற்றங்களை உடன் நிறுத்த இலங்கை ஆசிரியர் சங்கம் முறைப்பாடு

கிளிநொச்சி வலயக் கல்விப் பணிப்பாளர் திரு.கமலராஜனால் - முறையற்ற இடமாற்றங்கள் தொடர்ச்சியாக நடைபெற்று வருவதாகவும், இடமாற்ற நடைமுறைகளை உதாசீனம் செய்து எதேச்சதிகாரமாக செயற்படுவரும் அவரது நடவடிக்கைகள் எல்லைமீறிச் செல்கின்றமையைச் சுட்டிக்காட்டியும் இலங்கை ஆசிரியர் சங்கம் வடக்கு மாகாண கல்வியமைச்சின் செயலாளருக்கு முறைப்பாடு ஒன்றை மேற்கொண்டுள்ளது.

இந்த முறைப்பாட்டில் மேலும் தெரிவிக்கப்பட்டுள்ளதாவது –
கிளிநொச்சி வலயக் கல்விப் பணிப்பாளர் திரு.கமலராஜனால் - முறையற்ற இடமாற்றங்கள் தொடர்ச்சியாக நடைபெற்று வருகின்றன. இடமாற்ற நடைமுறைகளை உதாசீனம் செய்து எதேச்சதிகாரமாக செயற்படுவரும் அவரது நடவடிக்கைகள் எல்லைமீறிச் செல்கின்றமையை தங்களின் கவனத்துக்குக் கொண்டு வருகின்றோம். 

28.08.2020 நடைபெற்ற இடமாற்றச்சபை கூட்டத்தில் பரிசீலிக்கப்பட்ட இடமாற்றங்களில் - இடமாற்றச்சபையால் நிராகரிக்கப்பட்டிருந்த இடமாற்றங்களை கூட, வலயக் கல்விப் பணிப்பாளர் தன்னிச்சையாக வழங்கியுள்ளமையானது –2007/20 தேசிய இடமாற்றக் கொள்கைகளை மீறிய சட்டவிரோதச் செயற்பாடுகளாகும். 

யாழ்.மாவட்டத்திலிருந்து – பல சிரமங்களுக்கு மத்தியிலும் வெளிமாவட்டங்களுக்கு சென்று பல ஆசிரியர்கள் பணியாற்றி வரும் நிலையில் - கிளிநொச்சி மாவட்டத்தை தமது சொந்த வதிவிடமாகக் கொண்டவர்களுக்கும் புதிதாக நியமனம் பெற்று, நியமன நிபந்தனைகளைப் பூர்த்திசெய்யாதுள்ள சில ஆசிரியர்களுக்கும் - அவர்களுக்கு வசதியாக பாடசாலைகளை வழங்கும் செயற்பாடுகளையே கிளிநொச்சி வலயக் கல்விப் பணிப்பாளர், பக்கச்சார்பான முறைகளிலும், முறையற்ற வழிமுறைகளினூடாகப் பின்றபற்றி வருகின்றார். 

எனவே – கிளிநொச்சி வலயக் கல்விப் பணிப்பாளரால் மேற்கொள்ளப்பட்டுவரும் முறையற்ற இடமாற்றங்களை உடனடியாக நிறுத்துமாறும், 28.08.2020 நடைபெற்ற இடமாற்றச்சபையில் - இடமாற்றச் சபையால் நிராகரிக்கப்பட்டிருந்த நிலையிலும், வலயக் கல்விப் பணிப்பாளரால் ஏதெச்சதிகாரமாக வழங்கப்பட்டிருந்த இடமாற்றங்களை நிறுத்த உடன் நடவடிக்கை மேற்கொள்ளுமாறு கேட்டுக் கொள்கின்றோம்.

எனவும் முறைப்பாட்டில் தெரிவிக்கப்பட்டுள்ளது.