வடமாகாண கல்வியமைச்சினால் ஆசிரியர்கள் மட்டில் மேற்கொள்ளப்பட்டுவரும் அநீதிகளுக்கெதிரான போராட்டமாக எதிர்வரும் திங்கட்கிழமை 13.02.2017 அன்று செம்மணி வீதியிலுள்ள வடமாகாண கல்வியமைச்சின் செயலாளர் அலுவலகத்துக்கு முன்னால் - காலை 9.00 மணிமுதல் தீர்வு கிடைக்கும் வரையான தொடர்போராட்டம் ஒன்றை இலங்கை ஆசிரியர் சங்கம் நடத்தவுள்ளது.
10.01.2017 இல் தமது வெளிமாவட்ட சேவை நிபந்தனைக் காலத்தைப் பூத்தி செய்த ஆசிரியர்களால் நடத்தப்பட்ட கவனயீர்ப்புப் போராட்டத்தில் பங்கு கொண்ட ஆசிரியர்களை அச்சுறுத்தும் வகையில் - செயலாளரை தாக்கியதாக பொய்யான ஜனநாயக விரோத குற்றச்சாட்டுக்களை வடமாகாணக் கல்விப் பணிப்பாளர் சுமத்தி – அடிப்படையான விசாரணைகள் எதுவுமின்றி - மூன்று ஆசிரியர்களுக்கு பணித்தடை வழங்கப்பட்டது. ஆனால் - இன்றுவரை அவ்வாசிரியர்களை மீள இணைத்துக் கொள்வது தொடர்பில் எவ்விதமான நடவடிக்கைகளையும் வடமாகாண கல்வியமைச்சு மேற்கொள்ளவில்லை. இவ்விடயம் தொடர்பாக - வடமாகாண கௌரவ முதலமைச்சரின் கவனத்துக்கு கவனயீர்ப்பு மூலமாக கொண்டுவந்திருந்த நிலையிலும் - அதற்கான பதிலை கடந்த திங்கட்கிழமை வழங்குவதாகக் கூறிய நிலையிலும், முதலமைச்சரின் செயலகம் எவ்விதமான சாதகமான பதிலையும் வழங்கவில்லை.
வடமாகாண கல்வியமைச்சின் செயலாளரால் - பொலிஸில் மேற்கொண்டிருந்த முறைப்பாட்டில் கூட – செயலாளரால் குற்றங்களை நிரூபிக்க முடியாத நிலையில் - சமரசத்தில் முடிந்துள்ளது. பொலிஸாரின் முறைப்பாட்டில் தன்னை தாக்கியதாக முறைப்பாடு செய்த ஆசிரியரின் பெயர் தவறானது எனவும் குறிப்பிட்டிருந்தார். அப்படியாயின் - அந்த ஆசிரியருக்கு ஏன் பணித்தடை வழங்கப்பட்டது? அதேவேளை குறித்த மூன்று ஆசிரியர்களும் அலுவலகத்தில் தன்னை சந்தித்தபோது தாக்க முயற்சித்ததாக செயலாளர் குறிப்பிட்டிருந்தார். ஆனால் - அம்மூவரில் ஒரு ஆசிரியரே செயலாளருடனான சந்திப்பில் கலந்து கொண்டதாக விசாரணையின் போது ஆசிரியர்களால் குறிப்பிடப்பட்டிருந்தது. அப்படியாயின் மற்றைய இருவருக்கும் ஏன் வடமாகாணக் கல்விப் பணிப்பாளரால் பணித்தடை வழங்கப்பட்டது?
இதேவேளை – வடமாகாண எதிர்க்கட்சித் தலைவர் கௌரவ தவராசா – செயலாளரின் கொலரை ஆசிரியர்கள் பிடித்தனர் என ஆதாரமற்ற பொய்யான குற்றச்சாட்டை வடமாகாண சபையில் குற்றம் சாட்டியுள்ளார்.
பொலிஸில் செயலாளரால் தன்னை தாக்கியதாக மேற்கொள்ளப்பட்ட முறைப்பாட்டிலும் - வடமாகாண எதிர்க்கட்சித் தலைவரால் செயலாளரின் கொலரைப் பிடித்ததாக கூறப்படும் குற்றச்சாட்டிலும் உள்ள முரண்பாடுகளே – ஆசிரியர்கள் மட்டில் - வடமாகாண கல்வியமைச்சின் செயலாளராலும்;, வடமாகாண கல்விப் பணிப்பாளராலும் வேண்டுமென்றே சுமத்தப்பட்ட பழிதீர்க்கும் நடவடிக்கை என்பது நிருபணமாகியுள்ளது. இதன்மூலம் ஒட்டுமொத்த ஆசிரியர்களுக்கும் அபகீர்த்தியை ஏற்படுத்தியுள்ளனர்.
அத்துடன் - இடமாற்றச் சபையில் தீர்மானிக்கப்பட்ட பல விடயங்களை நடைமுறைப் படுத்தாமல் - ஏனைய தீர்மானங்களுடன் தொடர்புடைய வெளிமாவட்ட கல்வி தொடர்பாக சிந்திக்காமல் - அங்கு நிபந்தனைக் காலத்தைப் பூர்த்தி செய்தவர்களை விடுவிக்காமல் விட்டது - இடமாற்றச்சபையின் தீர்மானம் என எமது தொழிற்சங்கத்தினையும் சாடி வடமாகாணக் கல்விப் பணிப்பாளர் தப்பிக்க முயற்சிக்கின்றார். எனவே – வடமாகாண கல்விப் பணிப்பாளரின் முறைகேடுகள் விசாரிக்கப்படவேண்டும்.
எனவே - வடமாகாண கல்வியமைச்சினால் ஆசிரியர்கள் மட்டில் மேற்கொள்ளப்பட்டுவரும் அநீதிகளுக்கெதிரான போராட்டமாக எதிர்வரும் திங்கட்கிழமை 13.02.2017 அன்று செம்மணி வீதியிலுள்ள வடமாகாண கல்வியமைச்சின் முன்னால் - காலை 9.00 மணிமுதல் தீர்வு கிடைக்கும் வரையான தொடர்போராட்டம் ஒன்றை இலங்கை ஆசிரியர் சங்கம் நடத்தவுள்ளது. அனைத்து ஆசிரியர்களையும் ஒன்றிணைந்து பலம் சேர்க்குமாறு கேட்டுக்கொள்கின்றோம்.
No comments:
Post a Comment